Ffurfiwyd Côr Meibion Taf yn 2004 gan Robert Nicholls a fe oedd arweinydd y côr am y degawd cyntaf. Yn ystod yr ugain mlynedd a mwy diwethaf mae’r côr wedi tyfu i gynnwys dros chwe deg o aelodau sy’n byw yng Nghaerdydd a’r cyffiniau.
Mae’r côr wedi cipio’r wobr gyntaf deirgwaith yn yr Eisteddfod Genedlaethol, ac wedi perfformio’n gyson yng Nghymru a thu hwnt. Cynhaliwyd teithiau llwyddiannus ar hyd y blynyddoedd gan gynnwys ymweliadau cofiadwy â Gogledd America, Sbaen, yr Eidal, Iwerddon, yr Alban a Chernyw.
Mae’r côr wedi ymddangos ar lwyfan Neuadd Dewi Sant fel rhan o Proms Cymru ac fe fyddwn yn dychwelyd i Neuadd Frenhinol Albert ym mis Mehefin eleni i ganu yng nghyngerdd Gŵyl Corau Meibion Cymry Llundain. Gelwir ar y côr yn aml i gynnal cyngherddau er budd elusennau amrywiol, ac rydym wedi perfformio sawl gwaith yn Stadiwm y Principality cyn gemau rygbi rhyngwladol Cymru.
Mae uchafbwyntiau’r flwyddyn ddiwethaf yn cynnwys ennill cystadleuaeth y corau meibion yn yr Ŵyl Ban Geltaidd yn Iwerddon adeg y Pasg 2026 ynghyd ag ymddangos ar lwyfan Canolfan y Mileniwm yn noson ymddeoliad Geraint Thomas, y beiciwr o Gaerdydd, ym mis Tachwedd. Braint ac anrhydedd fawr iawn i’r côr oedd derbyn gwahoddiad i gyflwyno’r gerddoriaeth yn angladd y pêl-droediwr Terry Yorath yn Leeds ddechrau’r flwyddyn eleni (Ionawr 2027).
Ym mis Hydref eleni byddwn yn dychwelyd i’r Eidal fel y côr gwadd o Gymru yng ngŵyl gorawl flynyddol Carwyn James yn ardal Rovigo yng ngogledd-ddwyrain y wlad.
Mae’r côr wedi rhyddhau dau CD, ‘Gwinllan a Roddwyd’ a ‘Gwahoddiad’.
Er mwyn cysylltu â Chôr Meibion Taf ewch i’n tudalennau Facebook ac X (Twitter) neu ymwelwch â’r wefan www.cormeibiontaf.cymru
Arweinydd – Steffan Jones
Ganwyd Steffan yng Nghaerdydd yn 1987. Roedd yn Sgolor Corawl yng Nghôr Capel Coleg Worcester, Prifysgol Rhydychen, cyn symud i Lundain i astudio’r llais yn y Coleg Cerdd Brenhinol. Fel unawdydd, mae wedi canu gydag Opera Ieuenctid Cenedlaethol Cymru, Opera Cenedlaethol Cymru MAX, perfformio Requiem Fauré yn St Martin-in-the-Fields a Mass Bernstein yn Proms y BBC yn 2012. Yn 2011, enillodd yr Unawd dan 25 yn Eisteddfod Genedlaethol yr Urdd ac o ganlyniad fe gystadlodd yn Ysgoloriaeth Bryn Terfel ar S4C. Yn ystod 2014, teithiodd fel unawdydd i Ottawa, Canada, i wneud cyfres o berfformiadau gyda Chymdeithas Gymreig y ddinas. Yn Eisteddfod Genedlaethol Caerdydd yn 2018 fe gyrhaeddodd gystadleuaeth y Rhuban Glas. Yn ystod ei gyfnod yn Llundain, fe sefydlodd Aelwyd yr Urdd, gydag eraill. Ef oedd arweinydd cyntaf côr yr Aelwyd ac fe enillodd y côr merched yn Eisteddfod yr Urdd, Eryri 2012. Ers Tachwedd 2015, Steffan yw arweinydd Côr Meibion Taf ac ers hynny mae e wedi arwain y côr ar deithiau i Iwerddon, yr Eidal, yr Alban a Chernyw, ac mewn perfformiadau a chystadlaethau niferus ar draws Cymru ac Ewrop.
Cyfeilydd – Lowri Guy
Mae Lowri yn enedigol o Benrhyn-coch ger Aberystwyth. Derbyniodd radd BMus, dosbarth cyntaf ac MA, Anrhydedd mewn Cerddoriaeth o Goleg Prifysgol Cymru, Bangor, ac mae bellach yn bennaeth Cerddoriaeth yn Ysgol Llanhari yn Rhondda Cynon Taf. Mae’n gyfeilydd adnabyddus, ac wedi bod yn gyfeilydd swyddogol yn yr Eisteddfod Genedlaethol, ac ar gyfer Ysgoloriaeth Urdd Gobaith Cymru Bryn Terfel nifer o weithiau. Mae Lowri wedi bod yn gyfeilydd uchel iawn ei pharch i’r côr ers 2006. Mae’n briod â Tom, un o’r baswyr, ac mae ganddynt ddau o blant, Wil a Hanna.
DOD I ADNABOD LOWRI: YN EI GEIRIAU EI HUN
Adnabod ein haelodau
Er bod y côr wedi parhau i gyfarfod yn rhithiol yn ystod y cyfnod clo, roedd y bois yn gweld eisiau’r ymarferion wythnosol. Hwn yw’r cyfle i sgwrsio a chymdeithasu yn ogystal ag ymarfer y repertoire wrth gwrs. Fe benderfynon ni fynd ati felly i geisio dod i adnabod ein gilydd hyd yn oed yn well nag oedden ni eisoes a hynny trwy holi ac ateb cyfres o gwestiynau difyr ac ysgafn. Bydd pob aelod yn enwebu aelod arall yn ei dro.
TENORIAID
BARITONIAID
BASWYR